Cultura

«Cuentos y lleendes» recupera la obra narrativa de Llorienzu Novo Mier

05/09/2010 a les 15:58:18

El volume tituláu Cuentos y lleendes (númberu 7 de la colección Clásicos Contemporáneos de la editorial Trabe) recopila la obra narrativa de Llorienzu Novo Mier (1918-1990). Nél recuéyense trenta y siete cuentos inspiraos o basaos na tradición oral asturiana, que traten socedíos, lleendes o fechos ambientaos nel mundu rural del país, con títulos como «El degorriu d’Abéu», «La cueva de la guaxa», «L’home de piedra», «Les dos hermanes ximielgues» o «La ufierta». D’estilu arreyáu a les narraciones populares, tien un llinguaxe mui ricu característicu d’esti autor.

Llorienzu Novo Mier foi un escritor que supo facer de ponte ente l’asociación Amigos del Bable (creada en 1969) y la xente más mozo que fundo Conceyu Bable (nel añu 1974) y encabezó’l movimientu de recuperación llingüística y lliteraria que güei se conoz como Surdimientu. Activista cultural, persona inquieta, foi a sentar les bases de la narrativa asturiana, naquel entós tan poco triada. Foi tamién miembru de l’Academia de la Llingua Asturiana dende la so fundación.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam