Cultura

Cuco Suárez espón nel Centru de Cultura Antiguu Institutu

REDACCIÓN . UVIÉU - 06/02/2012 A LES 11:51:17

Dende’l 17 de xineru, y hasta’l 21 de febreru, Cuco Suárez (La Pola, Llaviana, 1961) va tener dos instalaciones espuestes nel Centru de Cultura Antiguu Institutu de Xixón onde propón una reflexón sobre’l poder y su repercusión na sociedá. Al traviés de dos de les sos últimes instalaciones, Hamlet y Sospechosos, esti performer y artista multidisciplinar trata sobre los comportamientos humanos. El montaxe pescuda tamién sobre l’arte y l’artista, y sobre la capacidá que tien pa usar delles disciplines como soportes del conceptu, ofreciendo discursos paralelos.

En Sospechosos, Cuco Suárez recuerda cómo, depués del socesu de les Torres Ximielgues, aplicando la teoría de la conspiranoia, el ser humanu del sieglu XXI convirtióse en sospechosu. Munches persones acaben siendo sospechoses de sí mesmes. El visitante de la esposición va interactuar cola muestra pasando per puertes detectores que van alertar de la so presencia con un turullu y una alvertencia pronunciada en dellos idiomes: «Sabemos quién ye, tenémoslu controláu».

Hamlet ye una instalación ciber-escultórica múltiple onde se revisa la traxedia de la vida y la muerte. Convídase al públicu a reflexonar sobre la vulnerabilidá de la vida y sobre la manera, tiempu y razón de la muerte, una metáfora que se materializa cola estroza adulces de les pieces na esposición.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam