Cuatro servicios de normalización llingüística ciarren al empezar l'añu

L'Asociación de Trabayadores de la Normalización Llingüística (ATNLL) acaba de denunciar lo que yá vien siendo vezu: que, de la qu'arrinca l'añu, dalgún de los Servicios de Normalización Llingüística (SNL) que dependen de los conceyos o mancomunidades asturianos nun sigue cola actividá. Asina, al empiezu del 2012 tóca-yos a la Oficina de Normalización Llingüística del Conceyu de Llaviana, la de Corvera y la Oficina Cultural y Lingüística da Mancomunidá Ozcos-Eo, que tán ensin actividá nin trabayadores, amestándose asina al pieslle nel mes d’agostu del 2011 del Serviciu de Normalización Llingüística de Mieres.

Aparte de la dificultá de la situación pa la normalización llingüística y del agraviu comparativu qu’esto supón pa colos usuarios d’estos servicios de normalización y pal personal llaboral que venía faciendo’l trabayu nellos, l'ATNLL nun entiende por qué unos conceyos tienen el SNL abiertu tol añu mentes Llaviana, Corvera y Ozcos-Eo, esti añu, y Mieres o la Mancomunidá del Sueve, n’exercicios pasaos, sufren «la desconsideración, dexadez y falta de compromisu de los responsables de los conceyos, que nun se quieren facer cargu d’estos servicios y los sos trabayadores mentes nun tengan na mano les perres que los financien».

Va pa más de nueve años qu’abrieron los primeros servicios de normalización nos conceyos d’Asturies. Nesti tiempu, l’ATNLL esplica que trabayaron por atopar soluciones a la inestabilidá llaboral y a la temporalidá de los SNL, presentando propuestes a la Dirección Xeneral de Política Llingüística pa camudar esta situación. La respuesta nestos años últimos, según l'asociación, «foi inorales y nun apurrir soluciones a los problemes que vienen denunciando».

El pieslle de los Servicios de Normalización Llingüística de Llaviana, Corvera, Mieres y de la Oficina Cultural y Lingüística d’Ozcos-Eo esti añu tien un problema amestáu, y ye que nestos meses pasaos estos SNL desenvolvieron, diseñaron y executaron delles campañes de normalización social del asturianu y del gallego-asturianu que se tienen que xustificar énte la dirección xeneral de Política Llingüística enantes del final de xineru del 2012. L'ATNLL entruga: «¿Cómo se va facer esti llabor si nun hai personal nin actividá nestos servicios?».

L'Asociación de Trabayadores de la Normalización Llingüística pide a la Dirección Xeneral de Política Llingüística, «acullá de continxencies polítiques o presupuestaries del momentu nel que tamos», una acción decidida de la Dirección Xeneral de Política Llingüística pa que los SNL puedan desenvolver el so trabayu nunes condiciones estables y dignes. L'ATNLL diz que'l métodu pol que se financien estos servicios nun ye l’afayadizu y nengún añu garantizó la continuidá de tolos SNL: «Esto ye una situación demostrable, basta con echar un güeyu pa lo que vien pasando munches veces nos conceyos o mancomunidaes que tienen estos servicios». Piden, polo tanto, que se reabran los servicios ciarraos nunes condiciones dignes que garanticen la estabilidá y continuidá del llabor que se vien faciendo y del personal que trabaya nellos col oxetivu de que la normalización social del asturianu y del gallego-asturianu sía un procesu activu y estable.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam