Asturies

Crónica: Los parllamentarios festexen en clave electoral el Día d’Asturies

09/09/2010 a les 12:37:34

XUAN BELLO | Uviéu
Na tarde del 7 de setiembre, a les 17.30 hores, xusto enantes de la concesión de les Medayes d’Asturies, celebróse lo que munchos consideren l’actu más políticu de la celebración del Día d’Asturies. Amás, esti añu, había delles novedaes. La más llamadera, seique, la puesta de llargu de Roberto Colunga como portavoz parllamentariu del Grupu Mistu (anque na copia de la so intervención poníase que yera portavoz parllamentariu del grupu del Bloque por Asturies); nes files del PP, a eses altures, inda se respiraba l’ansiedá creada poles duldes na elección del so candidatu. Asina. Joaquín Aréstegui, portavoz del PP na Xunta y ún de los nome clave de la terna que’l PP asturianu propón de posibles candidatos pa ciarrar el pasu a Francisco Álvarez-Cascos, aseguraba en conversación con esti redactor enantes d’escomenzar l’actu «que lo único seguro ye qu’al final va tener que llegase a un alcuerdu».

Pasín ente pasu, foron llegando les sos señoríes al hemiciclu, acompañaos nesta solemne ocasión por delles autoridaes civiles y militares. L’actu protocolariu diba mui bien llueu convertise nun actu políticu onde diben espresase les diverses tensiones que secuden l’arcu parllamentariu asturianu. El primeru en falar foi’l diputáu del Grupu Mistu Roberto Colunga, qu’esgrimió un discursu tensu y solitariu recibíu con un silenciu sepulcral y la sonrisa torcida, a última hora, de Javier Fernández y Fernando Lastra. Colunga, qu’escomenzó esplicando que pal «Bloque por Asturies esti plenu ye una oportunidá pa facer una reflexón de la situación política d’Asturies», refertó al Gobiernu d’Asturies «unos actos que son reflexu d’una Asturies vacia de conteníu y enllena de despreciu polo propio». Nun asturianu tenso, acusó al Gobiernu de potenciar «una Asturies artificial basada nel paletismu y nel autoodiu».

Colunga, depués d’esponer les idees fuerza de la so organización nun discursu marcadamente electoralista, convencíu de que’l futuru d’Asturies «pasa porque’l nuestru pueblu recupere la so capacidá de decisión sobre’l futuru», fixo un llamamientu «pa qu’esti 8 de setiembre deamos una respuesta democrática que contraponga al silenciu y la resignación del réxime, la esperanza d’un futuru meyor y la fuerza de la unidá pa facelo realidá».

Depués de Colunga, tocó-y la breda a Jesús Iglesias, paradóxicamente portavoz de la coalición Izquierda Xunida-Bloque por Asturies-Los Verdes. Tamién Iglesias usó la llingua asturiana, anque namás a la metá d’un discursu marcáu pola defensa de les polítiques sociales y industriales. Nesta llingua, mirando hacia Javier Fernández, esclarió: «Nuna situación tan complicada como la que vivimos, con niveles de paru preocupantes y con empreses en dificultaes y EREs, ye urxente que s’esclarien les duldes que se tán xenerando sobre les posibilidaes de futuru del sector de la minería. Namás faltaba qu’en menos de cuatro años hubiera que dar por finiquitada l’actividá minera, en mediu d’una crisis xeneral. Hai que llograr que se desbloquie’l Real Decretu que tien que regular les ayudes al sector y algamar el reconocimientu pola UE del carácter estratéxicu del carbón y l’establecimientu d’un réxime de subvenciones a la producción estable y permanente».

Mui críticu foi Joaquín Aréstegui col Gobiernu asturianu, del que llamentó que taba llevando a Asturies a la ruina por mui bien delles razones. «Diz un refrán asturianu que “cuando nun hai panchón too ye discusión», aseguró, mentes Fernando Lastra, portavoz socialista, llevantaba irónicamente los güeyos al cielu. Aréstegui criticó l’escasu pesu del Gobiernu asturianu en Madrid, al qu’acusó d’entorpecer les infraestructures asturianes. «Los que llevaben seis años poniendo fecha tres fecha pa la inauguración d’eses obres, güei, cola mesma rotundidá dicen que ye de llocos poner plazos a la so financiación», dixo, p’añadir qu’«a la indignación de la sociedá respuénde-y esti Gobiernu con conformismu».

Aréstegui aludió «al deterioru de los servicios públicos básicos» y señaló que «pela primer vez se nos plantea la inviabilidá de la rede d’infraestructures hospitalaries de la comunidá» o «se nos invita a qu’aceptemos como racionalización del mesmu la reducción del profesoráu pela primer vez na historia». Aréstegui nun duldó n’argumentar que «cuando más necesidaes tien la xente, mayores recorte sociales fai esti Gobiernu». Y anunció: «Esti ye’l Gobiernu del tisoriazu social». P’acabar, nun duldó n’encomendase a la Santina «pa inculcar sensatez a los gobernantes y clarividencia a los gobernaos».
Tres del portavoz del PP, tocó-y el turnu a Fernando Lastra, portavoz del grupu socialista, qu’esplicó l’«agresividá de Joaquín Aréstegui como síntoma de la que viven nel partíu. Espero que pronto resuelvan los sos problemes y podamos falar de dalgo», aseguró. Nun discursu ciertamente menos políticu, preocupáu por mantesese «en términos de cortesía institucional y respetu polos nuestros invitaos», Lastra faló en clave ideolóxica y recordó «que’l desempléu ye’l resultáu d’un modelu económicu que mostró les sos limitaciones y la so faz más negativa; un modelu basáu na especulación y na falta de controles de la economía que tien que ser superáu por otru basáu na economía productiva, la innovación y el conocimientu». «Pa ello», aseguró, «necesitamos más unidá na vida política y menos estratexes basaes na división y na falta d’entendimientu». Lastra, que dixo que «la patria d’un asturianu ye siempre la casa, la casa de los sos padres y los sos güelos», defendió que la posición asturiana «ye la que necesita España nel so eternu debate territorial, onde nunca falta l’oportunista que nun pierde la ocasión pa usar nel so provechu partidista los símbolos que son de toos, o los que traten d’atopar un destín pa la so identidá o un fetiche, llámese independencia o federalismu». Frente a otres posiciones polítiques, el socialista defendió que «l’alternativa ye la convivencia y l’oxetivu la igualdá de los españoles, independientemente del sitiu onde residan, sabiendo que lo opuesto a igualdá nun ye nin diversidá nin pluralidá; lo opuesto a igualdá ye desigualdá, xustamente contra lo que nós lluchemos siempre».

Punxo’l ramu a los actos protocolarios la presidenta de la Xunta Xeneral, María Jesús Álvarez, que nel so discursu institucional destacó qu’esti ye «ensin dulda’l tiempu de la política, de la política con mayúscula, de la política como serviciu públicu, como espaciu pal diálogu y el consensu». Un poco enantes señalara: «Requierse esfuerzu, trabayu, análisis rigorosu. Ye importante definir bien los problemes, acertar col diagnósticu, estremar la voces de los ecos, evitar la trampa de los nominalismos y dir a la sustancia de les coses», aseguró.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam