Asturies

Convócase’l Plenu de Siero pa escoyer alcalde

11/03/2010 a les 10:18:23

El plenu municipal pa escoyer l’alcalde nuevu del Conceyu de Siero ta convocáu pa esti vienres día 12 de marzu a les 10.30 hores. Va ser nesa sesión cuando se conoza al sucesor del ex-rexidor Juan José Corrales, que dimitió del cargu depués de sufrir un accidente y dar positivu na prueba d’alcoholemia.

El capítulu de la socesión abrió una resquiebra nel PSOE de Siero. L’Agrupación Socialista del conceyu apostó por qu’Ángel García ocupara’l cargu. Pero pa ello teníen que renunciar, por tar asitiaos más arriba nes llistes, Julio José Carretero Irazusta y Ángela Llende Arboleya, que nun lo fixeron. El PSOE decidió espulsalos del partíu. Como la decisión nun yera firme, Carretero podía siguir siendo’l cabeza de llista de los conceyales socialistes. Énte esta situación, el PSOE presentó un recursu contencioso-alministrativu que llevó al xuez a suspender la eleccion del alcalde provisionalmente. Depués de celebrase una vista, el xuez decidió que diba tener que celebrase esta selmana, porque nun había motivos pa siguir aplazando’l plenu.

El conceyal espulsáu del PSOE, Julio Carretero, y el popular José Antonio Noval, son los dos ediles que van disputar l’alcaldía de Siero. Cualquier resultáu ye posible, dada la formación complexa del Plenu. Dende PINSI, Juan Camino pidía «prudencia» y nun quixo avanzar qué diba votar –hasta agora diben votar al PSOE– hasta la reunión que va celebrar la xunta directiva na nueche d’esti xueves 11 de marzu. Tien dos votos. El conceyal de la Plataforma Vecinal de La Fresnera (PVF), José Carlos García, almitió contactos col PP anque, dixo, la so formación nun marcara una pauta de gobiernu, pero sí que-y transmitieren una posición clara pa llegar a alcuerdos. En cuantes a Conceyu, el conceyal Rafael Rodríguez manifestó tar «abiertu a too». Anque nun tuvo un alcuentru formal con PP nin col PSOE sí que, nun actu informal con un dirixente popular, tresmitió-y como condición «que cualquier apoyu al PP ta condicionáu a firmar un documentu d’alcuerdu de tolos conceyales que dean esi apoyu y firmar esi documentu enantes del plenu». Otra manera, Nicolás Fernández, conceyal d’IX-Bloque por Asturies-Los Verdes, va votase a él mesmu. Según dixo, «del PSOE danos lo mesmo que sía ún o otru porque la falta de respetu hasta agora foi total y al PP tampoco lu vemos como alternativa».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam