Les Noticies.com. Diariu dixital. 04-09-2010
Convócase un «casting» pa la película «Alegría», el primer llargu de Lucinda Torre
Fecha: 18/01/2010 a les 11:05:00La directora asturiana Lucinda Torre prepara'l so primer llargu, Alegría, «una historia de les muyeres silenciaes a les que-yos robaron la voz y a les que-yos silenciaron la so vida», en palabres de la realizadora. Pa facer la obra, el productor Juan Gona convoca un casting pa los díes 23 y 24 de xineru nel Auditoriu Príncipe Felipe d'Uviéu, el 30 y el 31 de xineru nes Escueles Dorado de Sama y el 6 y el 7 de febreru nel Centru d'Interpretación del Cine en Xixón.
La película enmárcase nel proyectu Primeras Tomas impulsáu pol Gobiernu asturianu. La directora quier incorporar a la obra «los talentos nuevos que sabemos que tán n'Asturies». La intención de Juan Gona y Lucinda Torre ye topar a los tres neños protagonistes n'Asturies y al restu del elencu, formáu por personaxes adultos mayores de venti años. Les pruebes tán abiertes a profesionales y amateurs y a la xente en xeneral que quiera averase al mundu del cine.
Les solicitúes pa participar nel casting han mandase al corréu casting@gona.es. La xente mayor ha mandar el so currículum y un retratu, y los neños, una semeya recién colos sos datos físicos y el contactu de la familia o los tutores.
Alegría va desenvolvese nun llugarín mineru del norte del Estáu en 1926. Nel llargu cuéntase la historia d'una neña de diez años, Alegría, que suaña con ser la maestra del pueblu onde vive y asina ayudar a ameyorar les condiciones nes que sobreviven los obreros de la contorna. Comprometida col so tiempu, un golpe del destín va cambiar los sos planes y va vese obligada a sobreponese a les peores pantasmes.
Torre define la so ópera prima como «una historia fondamente asturiana». Según la realizadora ye una película «na que podemos reconocenos, una metáfora de la nuestra propia esencia. Fala de nosotros y nosotres, de quién somos y de por qué somos. Disecciona parte de la historia contemporánea española al traviés de les vivencies de la xente d'Asturies y ye, p'acabar, un cantu a la llibertá».
La película va rodase dafechu n'Asturies p'aprovechar el so patrimoniu industrial y mineru y los escenarios naturales. Amás, tán preparándose unos platós de rodaxe n'Argame. L'equipu técnicu va buscar localizaciones en pozos mineros de los valles del Nalón y el Caudal y enclaves n'espacios como'l conceyu de Sobrescobiu y el Parque Natural de Redes.
26/08/2010 - Yá pues sentir «Sarxentu retonda», un nuevu cantar de Skama la Rede
06/08/2010 - Dii a dii en Loriant: entamu
14/08/2010 - Lorient : ultimu vienres
19/08/2010 - Prepárase’l VIII Salón del Llibru Asturianu
10/08/2010 - Loriant : el primer dii
RSS Lesnoticies.com
Apúntate en Facebook
Semeyes en Flickr
