Economía

El Conseyu de Gobiernu aprueba un presupuestu pa Política Llingüística de 2.135.034 euros

DAMIÁN BARREIRO . UVIÉU - 22/12/2011 A LES 17:40:34

El Conseyu de Gobiernu aprobó esti 22 d'avientu'l proyectu de Presupuestos Xenerales pal 2012, que xube a 4.208.665.523 euros y tien que remitise a la Xunta Xeneral. Hai tres conseyeríes que van aumentar el presupuestu (Educación y Universidades –2%–, Sanidá –6,7%–, y Bienestar Social y Igualdá –7,4%–), mentes que les demás van reducir el gastu. La que más va recortar el Presupuestu ye Presidencia –reduz el 51,6%–, siguida de Cultura y Deportes, que reduz el 28% y queda con 58.078.369. D'esta partida, 2.135.034 euros van dir pa promocionar l'asturianu, 675.525 menos que nel 2011.

Según indiquen dende'l Gobiernu, el presupuestu de la Dirección Xeneral de Política Llingüística pal 2012 va permitir desarrollar los oxetivos de protección, promoción y difusión del asturianu, «que nos marca la Llei d'Usu». Asina, van xebrar les acciones a favor del idioma en dos estayes: visibilización y normalización social.

La primera tien un aforru presupuestariu sobre l'exerciciu anterior de 231.585 euros menos (reduz un 24,87%), que vien fundamentalmente de partíes de publicidá, publicaciones, reuniones y conferencies, «amás d'otros gastos». Na segunda, l'axuste queda nun 30,88% menos. Según señalen, anque la partida va ser menor, nun va impidir la convocatoria d'ayudes en concurrencia competitiva pa entidaes locales, empreses, asociaciones, medios de comunicación, editoriales, discográfiques y productores de cine y videu, amás de la convocatoria de los premios lliterarios n'asturianu.

La Dirección Xeneral de Política Llingüística señala que foi una prioridá mantener la dotación presupuestaria de los Servicios de Normalización Llingüística municipales, «pol importante llabor de normalización que desarrollen y porque supón el mantenimientu de puestos de trabayu».

Otra manera, la Dirección Xeneral de Patrimoniu Cultural ta contemplada nel anteproyectu con un presupuestu de 18.120.00 euros, onde s'inclúi una partida pa conservar el patrimoniu etnográficu y otra destinada a la reparación del patrimoniu cultural d'El Valledor, depués de la quema qu'hubo na zona. Nesta Dirección ta inxerta una subvención de 800.000 euros a Recrea pal desarrollu de les actividaes del Centru Cultural Internacional Avilés, l'antiguu Niemeyer.

Otra manera, la Conseyería de Facienda va contemplar una tresferencia de 11 millones d'euros a RTPA, de los que 10 millones d'euros van destinase a financiar gastos corrientes y 1.177.700 euros a los gastos d'inversión. Esta transferencia supón un aforru del 290% sobre l'importe del 2011.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam