Llingua

El Conseyu d’Europa recuerda’l so llamáu «inequívocu» a declarar la oficialidá

11/11/2009 a les 18:30:00

La Xunta pola Defensa de la Llingua Asturiana (XDLA) aconceyó'l 31 d'ochobre pasáu con Alexei Kozhemyakov, xurista, diplomáticu y representante máximu del Secretariáu de la Carta Europea de les Llingües Minoritaries del Conseyu d'Europa. Nesti alcuentru, celebráu nel Festival Liet 09, na ciudá frisona de Ljuwert, Kozhemyakov «demostró'l so conocimientu y la so preocupación pola situación del asturianu», informó Carlos Pulgar, miembru de la XDLA que s'entrevistó col diplomáticu. «El representante del Secretariáu de la Carta Europea fixo una esposición de les acciones y actividaes que va desenvolver el Conseyu pa favorecer el cumplimientu de la Carta polos Estaos firmantes», esplicó Pulgar. Nesti sen, el xurista y diplomáticu quixo facer un recordatoriu al Estáu español, en cuantes qu'ún de los ventitrés Estaos que firmaron la Carta Europea, de que «ye la so responsabilidá cumplir esti testu».

El cumplimientu d'esti testu diba implicar, tal como espunxo Kozhemyakov, facer casu de la «recomendación inequívoca del Comité de Ministros, del Comité d'Espertos y del Conseyu d'Europa de la declaración del asturianu como llingua oficial». Carlos Pulgar señaló en rueda de prensa qu'ún de los fechos más «inesplicables» pa los responsables europeos de la Carta ye que l'Estáu español «respete los derechos llingüísticos de la ciudadanía nunos territorios sí y n'otros non», polo que Kozhemyakov entendía que l’Estáu español había dar les razones pa mantener esta situación de desigualdá ente la ciudadanía.

La XDLA fixo d’ella'l llamáu del representante del Secretariáu de la Carta Europea de les Llingües Minoritaries pa reclamar «a les instancies competentes del Estáu, como firmante de la Carta Europea, y a les autonómiques, como responsables directes de la política llingüística, el cumplimientu dafechu del tratáu firmáu y de la recomendación de la oficialidá de la llingua asturiana».
Ún de los problemes que se detecten pa que la Carta Europea tenga efectividá ye que les recomendaciones nun son vinculantes pa los Estaos: «Ta malo de forzar al Estáu a que cumpla eses recomendaciones, anque si se firma lo coherente yera llevales a la práctica», declaró Pulgar. Otra manera, dende la XDLA anuncióse que depués d'esta entrevista «quedaron abiertes les canales de comunicación col Secretariáu de la Carta Europea de les Llingües Minoritaries y nes próximes selmanes vamos dar a conocer delles actividaes que tenemos previstes en rellación a esti puntu».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam