Asturies

Conceyu Abiertu denuncia l'usu de toponimia non oficial nel enllaz de Ferrera a l'autovía minera

REDACCIÓN. UVIÉU - 25/01/2012 A LES 16:17:43

Les formaciones Conceyu Abiertu por Siero y Conceyu Abiertu por Noreña denuncien que la señalización nel enllaz cola autovía minera (AS-I) a l'altura de Ferrera incumple la toponimia oficial de los conceyos de Noreña y Siero, aprobaos nos años 2007 y 2009, respectivamente. Asina, el llugar de Ferrera aparez nos cartelos como La Ferrera y les denominaciones oficiales Ferrera de Baxo y Ferrera de Riba señalícense como La Ferrera de Abajo y La Ferrera de Arriba, según señalen entrambes dos fuercies polítiques.

Por too ello, Conceyu Abiertu por Noreña, que cuenta con un conceyal na corporación municipal, va solicitar que'l Conceyu solicite, énte les instancies que correspuenda, que se respete la toponimia oficial y que contacte col Conceyu de Siero «pa facer d'esti asuntu causa común». La formación anuncia que va presentar esta petición en forma de ruegu nel Plenu que se va celebrar el xueves 26 de xineru.

Sicasí, según denuncia Conceyu Abiertu, los errores na señalización del enllaz nun queden nel topónimu de Ferrera, sinón que los carteles indicativos tampoco nun recueyen la forma oficial de la capital del conceyu de Siero –La Pola Siero–, sinón la forma anterior –Pola de Siero–. Les dos formaciones, nun comunicáu conxuntu, califiquen de «chambonada» la señalización y consideren que los Conceyos habríen tomar cartes nel asuntu pa que l'enllaz recueya los nomes de llugar correctos. Amás, acusen a los Gobiernos municipales respectivos de nun tar «sollertes» al desenvolvimientu de les obres nin preocupaos pola bona señalizacion de los núcleos de población.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam