Llingua

Comiencen en Cangas los cursinos d'asturianu de la ALLA

02/08/2010 a les 19:12:16

Esta mañana entamaron los diferentes cursos de la UABRA (Universidá Asturiana de Branu) que la Academia de la Llingua Asturiana organiza cada añu en colaboración cola Universidá d'Uviéu y que permiten algamar un títulu oficial de conocimientu d'asturianu. Dende les 11 de la mañana taba abierta la Escuela Hogar de Cangas del Narcea pa recibir a los alumnos que, depende de la duración del cursu, pasarán una o dos selmanes equí agospiaos. Les clases van a recibiles nel Institutu d'Educación Secundaria de Cangas pela mañana y pela tarde.

Tamién tan preparaes actividades culturales abiertes a tola sociedá canguesa. Güei presentóse nel Palaciu d’Oumaña, Casa la Cultura de Cangas, la esposición d’Adolfo Manzano, «Pequeñes nubes nel cielu, nel xardín xuxurios», qu’en palabres del artista pretende reflexar al xardín cumo espaciu onde confluyen lo público y lo privao a traviés de les distintes formes de materialización de la vida y la muerte.

L'actu oficial de presentación d'esta décimo octava edición daba comienzu a les 14 hores cola presencia del Conseyeru d’Educación, José Luis Iglesias Riopedre; l’Alcalde de Cangas del Narcea, José Manuel Martínez; la Conceyala d’Educación y Cultura del Conceyu Cangas, Bibiana Martínez; la Presidenta de l’ALLA, Ana María Cano; el Director de la UABRA, Xosé Antón González Riaño y el Secretariu, Pablo Xuan Manzano Rodríguez. Toos manifestaron una satisfacción bien fonda énte l’afrontamientu d’esti proyectu nuevu y apasionante.

Col Cursu Elemental de Llingua Asturiana, Cursu Avanzáu de Llingua Asturiana y Curso de Capacitación pala Traducción al Asturianau pueden obtenese créditos de llibre configuración valederos pala Universidá d'Uviéu. Amás de los básicos, dientro de los cursos d'Afondamientu Llingüísticu, esti añu los escolinos que yá tan apuntaos esfruten d'estos otros: Internet y asturianu: aplicaciones socio-educatives; Cursu d’averamientu a la llocución periodística en llingua asturiana; Cantares, bailles ya instrumentos musicales asturianos; La lliteratura asturiana nel aula d’Educación Primaria; Cursu d’aniciu a la investigación dialeutal, toponímica y de tradición oral; Cursu d’entamu a la investigación hestórica de la llingua asturiana. Tamién va desendolcase la segunda fase del Curso de Gallego-Asturiano. Igual que los otros cursos capaciten a los diplomaos en Maxisteriu pala impartición de clases d'asturianu, esti lo fae pa les de a fala.

Tolos Cursos tienen reconocencia oficial per parte de la Conseyería d'Educación del Principáu d'Asturies. Ello afita a tolos efeutos la reconocencia d'estos Programes Formativos dende'l puntu de vista alministrativu (currículum, méritos, sexenios, etc.) pal profesoráu d'Educación Primaria y Secundaria del Principáu d'Asturies. Lo mesmo sirven p'amosar conocimientos de llingua asturiana en cualesquier alministración que lo requiera y como preparación pales persones que quieran cursar llueu los estudios d'Espertu Universitariu en Filoloxía Asturiana y d'Especialista Universitariu en Filoloxía Asturiana. La matrícula nos cursos inclui'l material escolar, pero tamién, agospiu y comida, polo que la inmersión llingüística ye total.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam