Llingua

Colunga: «El Gobiernu miente sobre la creación de la Especialidá de Llingua Asturiana»

21/02/2011 a les 13:01:00

El diputáu del Bloque por Asturies na Xunta Xeneral, Roberto Colunga, denuncia que ye la tercer vez que se refuga na Xunta de Portavoces la propuesta pa que se discuta la creación de la especialidá de Llingua Asturiana nel parllamentu asturianu. Pa Colunga esto ye «otra demostración más del pactu qu'amagostaron el Partíu Popular, el PSOE y Izquierda Xunida-Los Verdes pa nun discutir d'ello».

El Bloque por Asturies insta al Conseyu de Gobiernu a que «d'una vez por toes se normalice la situación na enseñanza de la llingua asturiana», porque «tenemos porcentaxes altísimos d'estudiantes n'educación primaria, secundaria y bachilleratu». Recuerden qu'hai «más de 20.000 escolinos y cuasi 200 profesores qu'imparten la materia», y qu'anguaño «viven nuna situación d'anormalidá».

El diputáu asturianista recalca que «ye mentira que pa crear la Especialidá de Llingua Asturiana l'idioma tenga que ser oficial», igual que «ye mentira que sía'l Ministeriu español d'Educación el que ponga problema pa la creación». Colunga afirma que'l Gobiernu d'Asturies «miente a sabiendes y de mala fe con esti tema», y recuerda'l conceyu del 4 de febreru col Ministeriu d'Educación nel que se faló'l tema de la Espacialidá d'Asturianu nuna mesa de negociación sectorial que trataba'l proyectu Real Decretu d'Especialidaes de Maestru. La repuesta del representate del Ministeriu d'Educación, Miguel Soler García, foi que'l «Ministeriu preguntó al Gobiernu del Principáu pola propuesta que fixera'l sindicatu Suatea pa crear la especialidá de llingua asturiana y la repuesta de los representantes del Gobiernu Asturianu foi negar l'interés en crear la especialidá».

Colunga cree qu'«esto ye otra falta de respetu más del Gobiernu asturianu, que ta mariando y mintiendo col tema de la Especialidá de Llingua Asturiana pa nun cumplir con un puntu importante del pactu de Gobiernu». Amás, apunta que siguen «faciendo burlla d'un colectivu discrimináu históricamente y que nun va poder tener los mesmos derechos p'acceder a un puestu de trabayu con normalidá». El Bloque por Asturies va pidir la comparecencia del Conseyeru d'Educación, Herminio Sastre, pa que «dea la cara y nun s'escuenda tres la mentira», porque «nin los escolinos nin los maestros tienen que siguir aguantando un minutu más los caprichos y les obsesiones d'unos políticos que son parte del pasáu».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam