Llingua

Colodrón: «L'únicu tratu seriu que se-y da a la Llingua Asturiana ye acabar con ella cuanto primero»

03/05/2010 a les 10:13:46

EL TSXA entendía nuna sentencia recién que l'asturianu yá ta presente na Educación Infantil, al integrase dientro de los conteníos de Cultura Asturiana. Sicasí, la realidá ye qu'hai centros que soliciten poner Llingua Asturiana n'Infantil y, desque se publicó'l currículum nel 2008, la Inspección Educativa niéga-yos esta posibilidá amparándose nesti testu. Una situación que yá foi denunciada pol sindicatu SUATEA, tal como esplica'l responsable de Llingua Asturiana, Xosé Lluis Colodrón.

¿Qué presencia tien la Llingua Asturiana na Educación Infantil?
Namás el 13 por cientu del alumnáu d'Infantil recibe Llingua Asturiana. Dase nunos centros sí, na minoría, y n'otros non.

Al nun tar reconocida esta asignatura pa esta etapa, ¿cómo s'encaxa la Llingua Asturiana na docencia?
Cuando se principió a dar nun había nengún currículum d'Infantil y basándose nos alcuerdos qu'hai sobre l'asturianu dábase Llingua Asturiana, pero a partir d'agora con esti currículum interprétase restrictivamente'l testu y niégase dar esta materia. Así qu'a la xente que ta consultando a la Inspección si se pue dar Llingua Asturiana n'Infantil dícen-yos que non. Ello ye que lo que fai agora'l profesoráu ye integrar estos conteníos globalmente na etapa dientro de les unidaes didáctiques dirixíes a los y les escolines d'Infantil. Sicasí, hai una Llei d'Usu que diz que s'ha garantizar la enseñanza del asturianu en toles etapes y ye un derechu de les families a escolarizar a los fíos y fíes nesta llingua, pero l'Alministración nun fai otro que remitise al so currículum y insistir en que nun hai hores de Llingua Asturiana. Equí nun hai un tratu seriu del asuntu, l'únicu tratu seriu ye acabar con esto cuanto primero.

¿Qué estatus consideren qu'había tener l'asturianu n'Infantil?
Como una llingua vehicular y usada al mesmu nivel que les demás llingües, como'l castellanu o l'inglés. Había facese una planificación llingüística nel centru y que s'atendiera a la etapa d'Infantil, que ye fundamental pa la educación, porque pa munchos neños ye la llingua materna. L'asturianu había tar integrao llingüísticamente a nivel d'equidá coles demás llingües y como llingua vehicular. Eso d'enseñar a los asturianos la llingua asturiana como una llingua estranxera nun ye de recibu. Y inclusive les llingües estranxeres yá tienen un tratu más paritariu col castellanu. L'asturianu había ocupar un tiempu importante na educación, anque sabemos que tamos a años lluz d'esta posibilidá; pa l'Alministración ye como falar del estracosmos…

¿Qué importancia tien la presencia del asturianu nuna etapa como infantil?

Precisamente nesta etapa ye cuando se ta consolidando tol llinguaxe y el llinguaxe ye fundamental pal desarrollu del pensamientu, dalgo que sabe cualquier psicollingüista. Nun sería namás p'alfabetizar como llingua estranxera, sinón como preséu de pensamientu, de comunicación y de desarrollu personal, polo qu'había de mantenese l'idioma en cuenta de facer una ruptura, sobre manera col alumnáu que tien la nuestra llingua como materna. Tolos que tenemos l'asturianu como llingua materna nos podemos reconocer nesti problema que se produz na escuela pol choque llingüísticu. Ye fundamental que na etapa d'acoyida al sistema educativu tea la llingua propia de los neños.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam