Cultura

«Chatarrona» supera les 17.000 visites nes tres primeres selmanes d'emisión

REDACCIÓN. UVIÉU - 05/01/2012 A LES 12:30:30

La sitcom Chatarrona, una producción de Publicaciones Ámbitu destinada a la so emisión per internet, yá supera, en tres selmanes, los 17.000 visionaos. Sumando les reproducciones de los tres capítulos disponibles hasta'l momentu, dan un total de 17.100 espectadores dende'l 13 d'avientu, amás de collechar decenes de comentarios positivos tanto nel canal de Youtube como na páxina web www.chatarrona.com.

La producción de Chatarrona puede calificase de low cost, pos fíxose con un presupuestu baxu pa lo que suelen costar esti tipu de productos audiovisuales, pero íntegramente con profesionales –tanto na parte técnica como d’interpretación– que desarrollen el so trabayu n’Asturies. Na escoyeta de los actores, optóse por combinar la esperiencia de Pedro Durán y Alberto Rodríguez –bien conocíos pola so participación en programes de TPA como Terapia de Grupo o El Chigre– cola frescura y solvencia de Juana Marrón y el debú de Masokhna Diop, dos intérpretes que desenvuelven nesti trabayu un repertoriu bien grande de rexistros espresivos.

Chatarrona ye una comedia gris, urbana y contemporánea, que cuenta la historia de dos amigos nuna situación desesperada: Chuso (Alberto Rodríguez) y Esteban (Pedro Durán) viven nun apartamentu propiedá de los padres de Chuso, que yá nun usen porque compraron un pisu meyor. Al ser una vivienda de la familia, nun paguen renta, namás los gastos, pero entrambos dos tán al paru y yá nun tienen derechu a prestaciones económiques, asina que Chuso decide que la meyor manera de sacar perres ye poner un anunciu pa garrar inquilinos que quieran compartir pisu y, de pasu, aprender un idioma, l’asturianu. Un negociu basáu nos típicos programes internacionales, pero aplicáu a Asturies.

Chuso ta mui ilusionáu pero Esteban ye mui escépticu col presuntu negociu. Esteban ta mui deprimíu desque perdió’l trabayu, la vida regalada que llevaba como presentador estrella de la tele, la fama y almiración de los telespectadores, y agora vive pendiente d’una llamada de teléfonu del so axente que lu devuelva a los platós y a los prime time. Por fin, l’anunciu de Chuso tien efectu y dos persones interesaes nel tratu lleguen a la so casa y a les sos vides, Carolina (Juana Marrón) y Malik (Masokhna Diop).

Les situaciones que viven estos cuatro personaxes fain de Chatarrona un retratu social d’Asturies, onde rescamplen los contrastes que xenera la crisis económica. La serie xuega con referencies a l’actualidá informativa, la historia de la llucha obrera nel país, los ídolos deportivos nuevos o los conflictos sociales –como’l machismu o’l racismu– col oxetivu d’esplotar un humor tan nuestro como único en mundu, al mesmu tiempu que da una visión positiva del procesu de recuperación llingüística.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam