Cultura

El Centru Cultural Avilés va programar 26 actividaes ente febreru y abril

REDACCIÓN. AVILÉS - 02/02/2012 A LES 14:22:18

El conseyeru de Cultura y Deportes, Emilio Marcos Vallaure, presentó'l miércoles 1 de febreru la programación del Centru Cultural Internacional Avilés pa los meses de febreru a abril, onde s'inclúin 26 actividaes, ente teatru, música, danza y esposiciones. El propiu conseyeru informó de que'l costu total de la programación va ser inferior a los 100.000 euros, «cinco veces menos de lo que costó Luz», la esposición de Carlos Saura cola que s'inauguró'l centru.

El calendariu d'actividaes va inaugurase'l 16 de febreru col conciertu del Erik Trufaut 4tet, primeru del ciclu Jazz in Blue 2012, que va llevar al auditoriu de la ría d'Avilés al Joe Lovano Quartet (10 de marzu), Robert Glasper Experiment (26 d'abril) y The Bad Plus (11 de mayu). Na programación musical destaca l'actuación, el 25 de marzu, de Pablo Milánes, nome al que se sumen los de Joana Amendoeira (17 de marzu), Jonathan Richman (22 de marzu), El Sueño de Morfeo (31 de marzu) y José Mercé (13 d'abril).

Amás, el Centru Cultural Internacional Avilés tien acutáu un sitiu pa la música clásica na Sala Club, un espaciu mui afayadizu pa la realización de conciertos de cámara. El grupu asturianu de música barroca Forma Antiqva va ser l'encargáu d'abrir el ciclu, onde se va ofrecer un repertoriu que va dende la música antigua hasta la del sieglu XX. Ensin dexar l'apartáu musical, baxo la marca Ría Suena va presentase una escoyeta del meyor soníu presente na escena contemporánea más próxima. Nesti trimestre, el ciclu va incluír once actuaciones qu'abarquen cuasi tolos xéneros: de la canción d'autor al punk, de lo electrónico a lo acústico y de la superbanda al combu clásicu de tres pieces.

Na estaya de teatru, el centru cultural diseñáu pol arquitectu Oscar Niemeyer va acoyer les representaciones de les obres Brokers (3 de marzu); Lentas pero seguras (8 de marzu), de la compañía Higiénico Papel Teatro, y La sonrisa etrusca (14 d'abril), protagonizada por Héctor Alterio y Julieta Serrano. Otra manera, la programación cinematográfica del Centru Cultural Internacional Avilés naz cola intención de valir d'apoyu y difusión a la creación de los talentos más nuevos de la cinematografía española y asturiana.

La programación d'esti primer trimestre complétase con dellos espectáculos y talleres destinaos al públicu infantil y la esposición de la fotógrafa avilesina Soledad Córdoba.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam