Asturies

IX va centrar la reivindicación del 8-S nes respuestes a la crisis y el modelu d'autonomía

06/09/2010 a les 13:37:33

El coordinador xeneral d’Izquierda Xunida, Jesús Iglesias, calificó’l 8 de setiembre como una xornada reivindicativa que pa la organización va tar marcada pola convocatoria d’una fuelga xeneral el próximu 29 de setiembre, la necesidá de respuestes a la crisis, la reivindicación de les grandes infraestructures y el modelu d’autonomía p’Asturies.

El númberu ún d’IX compareció güei llunes 6 de setiembre xunto a Enrique Fernández, miembru de Los Verdes, y Cheni Uría, de Lliberación, pa presentar los actos que la coalición va entamar esti 8 de setiembre. Una xornada que van festexar en Santalla d’Ozcos, onde tamién va asistir el coordinador federal d’IX, Cayo Lara.

Iglesias afirmó qu’esperen axuntar en Santalla a toles sensibilidaes de la esquierda tresformadora, l’asturianismu y l’ecoloxismu «pa facer una reflexón colectiva sobre cómo tien que ser l’Asturies que queremos construír».

Ente les reivindicaciones de la xornada señaló la importancia d'acabar les grandes infraestructures d’Asturies énte los recortes del Ministeriu de Fomentu. Amás, dixo que tamién había que falar d’asturianismu y autogobiernu. «Anque anguaño nun sía una preocupación fundamental de los ciudadanos, l’autogobiernu val pa dar ferramientes que nos dexen encarar la crisis», señaló.

El coordinador d’IX dixo que no que queda de llexislatura nun diba poder ponese en marcha un nuevu procesu de reforma estatutaria, afirmando que por suerte’l testu pactáu ente FSA/PSOE y PP quedo «felizmente frustáu» al ser un Estatutu «de mínimos».

Asina, recordó que les persones que resulten escoyíes nes próximes elecciones de mayu del 2011, van tener qu’abrir el procesu de reforma del Estatutu d’Autonomía. «Entós los ciudadanos tendrán que saber el modelu que proponen los distintos partíos políticos», apuntó.

El coordinador d’IX tamién fixo referencia a la fiesta minera de Rudermu, onde afirmó que se vieron les «contradicciones» a la hora de dar salida a la crisis: «D’un llau tán los que s’apoltronen a les esixencies del capitalismu, adoptando la ideoloxía de la derecha, y quien quier dar una respuesta social».

Asina, señaló l’ausencia del presidente del Gobiernu central, José Luis Rodríguez Zapatero, como una renuncia colos sos compromisos anteriores. «Nós nun vamos renunciar a les polítiques que fiximos nos últimos años pa ser garantes de les polítiques sociales, hai que meyorar les condiciones de vida de los más desfavorecíos y facer una reforma fiscal pa que los que más tengan sían los que más paguen», afirmó.

Mentes, dende Lliberación, Cheni Uría, dixo que tienen la voluntá de reafirmar la confianza de dellos sectores del asturianismu cultural y políticu nel proyectu d’Izquierda Xunida. Coles mesmes, apuntó hacia la coalición como la meyor garantía de defensa de les polítiques sociales, de los valores medioambientales y de la cultura asturiana, «amenazada más que nunca por síndromes tan destructivos como’l representáu por José Luis Moreno».

Per otru llau, Enrique Fernández de Los Verdes, que faló n’asturianu occidental, dixo que la celebración del Día d’Asturies en Santalla d’Ozcos muestra’l compromisu de la coalición col occidente y col rural asturianu.

Valledor, en Xixón
Jesús Iglesias tamién fixo referencia a la non asistencia de l’ex-diputáu d’Izquierda Xunida Francisco Javier García Valledor a los actos de Santalla, depués de qu’él mesmu confirmara a LES NOTICIES que diba tar en Xixón na convocatoria de la Plataforma Unitaria 8 de Setiembre.

Al preguntá-ylo los periodistes, Iglesias afirmó que la non asistencia de Valledor yera una consecuencia de la democracia, «onde caún pue tar onde meyor-y pareza».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam