Les Noticies.com. Diariu dixital. 04-09-2010
El centenariu del pintor Aurelio Suárez conmemórase con esposiciones n'Uviéu, Xixón y Candás
Fecha: 07/02/2010 a les 08:00:00El Muséu de Belles Artes, la Biblioteca Xovellanos, la Sala Cornión y el Muséu Antón de Candás van exhibir la obra del pintor Aurelio Suárez (1910-2003) nos próximos doce meses por cuenta de la conmemoración del so nacimientu, que se cumple anguaño.
Dende'l branu hasta'l 14 de xineru del 2011 van poder vese estes cuatro esposiciones coles sos correspondientes publicaciones y ediciones de material pa la divulgación de la obra. Con esta iniciativa, el Gobiernu d'Asturies quier facer un homenaxe a la obra d'«ún de los nomes imprescindibles del arte asturianu contemporaneu».
La intención de la Conseyería de Cultura ye enseñar nel Belles Artes los materiales aurelianos que formen parte de los fondos de la pinacoteca y amestar otros elementos, como una publicación que va salir n'ochobre, cola que se quier contestualizar meyor el trabayu d'Aurelio Suárez. Nel branu, el Muséu Antón va exhibir la colección d'oxetos tridimensionales, escultures en madera, piedres, ensamblaxes, caxes y muebles del artista, mentes que la Biblioteca Xovellanos va mostrar a partir de payares una escoyeta d'obres que tienen el llibru como soporte, y la Sala Cornión va preparar una antoloxía de materiales aurelianos.
Aurelio Suárez principió la carrera pictórica dende mui nuevu, anque de mano quixo más les ciencies y llegó a cursar estudios de Medicina en Madrid. Sicasí, la pintura, una pasión heredada de so padre, foi'l marcu nel que se desenvolvió la so carrera profesional.
L'artista vivió en Barcelona, Madrid y Valencia primero d'establecese definitivamente en 1940 en Xixón, onde morrió n'abril del 2003. Suárez compaxinó la so intensa y sistemática actividá pictórica con otros trabayos, como decorador de pintures y estampación de pieces nuna comercial de lloza xixonesa o caricaturista nel diariu La Prensa.
Los sos métodos y los conteníos del so universu pictóricu, qu'él mesmu llamó irónicamente aurenialismu, resúmense nuna actitú y una práctica caracterizaes pola llibertá radical d'execución, la so entrega metódica al trabayu y la organización de la obra nunes pautes que, de dalguna manera, trescienden la pieza individual y fáenla formar parte d'un universu orgánicu. A pesar de que fixo bien d'esposiciones individuales, la primera en Xixón en 1929, Aurelio Suárez decidió abandonar la so actividá espositiva en 1961.
Desque morrió, nel 2003, socediéronse ininterrumpidamente grandes esposiciones antolóxiques celebraes n'Uviéu y Xixón, nes que se foron conociendo partes sustanciales de la so última obra, al tiempu que foron apareciendo dellos estudios y monografíes.
26/08/2010 - Yá pues sentir «Sarxentu retonda», un nuevu cantar de Skama la Rede
06/08/2010 - Dii a dii en Loriant: entamu
14/08/2010 - Lorient : ultimu vienres
19/08/2010 - Prepárase’l VIII Salón del Llibru Asturianu
10/08/2010 - Loriant : el primer dii
RSS Lesnoticies.com
Apúntate en Facebook
Semeyes en Flickr
