Asturies

Cándido y Morala piden al Conseyu de Ministros qu'esclarie si han pagar la multa qu'esixe'l xuez

02/03/2010 a les 21:03:13

Los sindicalistes Juan Manuel Martínez Morala y Cándido González Carnero, condenaos polos estrozos a una videocámara de vixilancia nuna de les movilizaciones de Naval Xixón, solicitaron al Conseyu de Ministros qu’esclarie l'indultu parcial que-yos concedieron y que reduz nun añu la pena privativa de llibertá, pa saber si-yos condonaron o non la multa de 2.160 euros que sigue esixéndo-yos el xuez, y pola que'l xulgáu piensa embargar les sos cuentes.

Cándido indicó que recurren al Conseyu de Ministros desque acabó la vía xudicial, depués de que l'Audiencia Provincial d'Asturies desestimara’l so recursu contra l'abonu de la multa. L'Audiencia, nel so autu, considera qu'al nun mentase la multa nel indultu dictáu pol Conseyu de Ministros significa que nun tán exoneraos d'abonala.

Cándido adelantó que nun piensen pagar la multa, y mentanto’l maxistráu del Penal 1 de Xixón, Lino Rubio Mayo, sigue estudiando la forma d'embargar los bienes de los dos sindicalistes, desque se comprobó que les cuentes de les que quería cobrar la multa nun yeren válides por tar una cancelada y tar la otra a nome de la madre d’ún de los sindicalistes. Yá nel so día, tanto Cándido como Morala criticaron que yeren oxetu d'una «obsesión-represión y persecución tanto del xuez como de les instituciones», y culparon especialmente a la Delegación del Gobiernu n'Asturies.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam