Asturies

Bloque y UNA piden en Xixón una alternativa «pol futuru d'Asturies»

09/09/2010 a les 16:03:24

Unes 300 persones axuntáronse en Xixón esti Día d’Asturies na convocatoria de la Plataforma Unitaria 8 de Setiembre. Los convocantes afirmaron que ye’l momentu de sumar voluntaes «pa facer una alternativa social y política a la situación actual». L'actu, que tenía como lema Pol futuru d'Asturies, trescurrió nos Xardinos d'El Náuticu y taba sofitáu por partíos políticos como Bloque por Asturies o Unidá Nacionalista Asturiana, amás de sindicatos como Suatea, ente otros. Nel actu tamién participó l'ex-conseyeru de Xusticia Francisco Javier García Valledor.

Nun manifiestu común, lleíu pol actor Toño Camaño, los organizadores criticaron los actos organizaos pol Gobiernu asturianu, que según afirmaron muestra’l modelu d’Asturies que los partíos mayoritarios lleven potenciando dende la creación de l’autonomía: «Un modelu que niega la nuestra capacidá p’autogobernanos, la negación de la nuestra capacidá p’articular respuestes a la crisis económica y la negación de la nuestra cultura y historia».Coles mesmes, afirmaron que'l país ta indefensu énte les consecuencies de la crisis, «y too ello énte la falta de capacidá de respuesta d'un Gobiernu asturianu cautivu de los dictámenes y los intereses del Gobiernu español».

Pa les organizaciones pertenecientes a la Plataforma, la «desafección» col procesu autonómicu que mostraba la última encuesta del CIS n’Asturies ye consecuencia de los xestores políticos asturianos. Nesa encuesta podía vese que más d’un 50% de la población d’Asturies, el porcentaxe más altu del Estáu, considera que’l Gobiernu nun tien capacidá pa defender los intereses d’Asturies.

«Cuando dende’l mesmu Gobiernu se potencia qu’un pueblu nun s’enfote nes sos fuerces y nes sos capacidaes, especialmente n’época de crisis, ye lóxico qu’acabe refugando la capacidá d’autogobernase y que se convierta nun pueblu acomplexáu, paralizáu y ensin autoestima», afirmaron. Los colectivos convocantes mostraron nel manifiestu final que comparten la convicción de que fai falta un cambiu «ensin espaciu pal pesimismu». Asina, dixeron que la sociedá asturiana tien que principiar un movimientu «que marque un puntu d’inflexón na dinámica de los últimos años».

«Esta alternativa que necesita y, tamos convencíos, que demanda un importante sector de la nuestra sociedá, ye posible porque hai muncha xente que tamos dispuestos a trabayar pa devolver a la nuestra sociedá l’optimismu, l’autoestima, l’arguyu, el dinamismu y la capacidá de respuesta», señalaron.

Les organizaciones afirmaron que’l futuru ta en que’l nuestru pueblu recupere la so capacidá de decisión y la puesta en marcha de polítiques al serviciu de la mayoría «col oxetivu d’una sociedá basada na xusticia social, la rexeneración política y la firme defensa del mediu ambiente».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam