Llingua

El Bloque por Asturies considera una postura «cerril y inorante» que Consuelo Vega fale d'«imposición» del asturianu

11/03/2010 a les 16:03:18

El Bloque por Asturies respondió a les declaraciones feches pola directora xeneral de Política Llingüística, Consuelo Vega, na RTPA, nes qu'afirmaba que la xente d'Asturies ta d'alcuerdu con que s'use l'asturianu pero non con «imposiciones» que xeneren «resquiebra» social. Pablo Fernández, portavoz de la organización, comentó a Europa Press qu'«usar el términu imposición pa falar del asturianu namás demuestra que tres de tou esti conflictu hai un pensamientu cerril, acomplexáu y inorante que lo único que busca ye distorsionar el llibre usu de la llingua asturiana».

A xuiciu de Fernández, n'Asturies «nun se respeten los derechos llingüísticos» y «l'exerciciu de cualquier derechu siempre va apareyáu d'un exerciciu de responsabilidá de l'Alministración pa que garantice la utilización de los mesmos, nesti casu del asturianu».

Igualmente, el portavoz del Bloque afirmó qu'«Asturies nun pue ser un país modernu y cultu mentes existan políticos que tean en contra de la oficialidá», lo que na so opinión «ye un déficit democráticu flagrante y esto nun casa con un país cultu» Nesti sen, Pablo Fernández amestó que l'asturianu «como llingua supón la máxima espresión de la cultura y la identidá asturianes, polo que pone-y pilancos supón condenalo a les puertes d'una muerte paulatina».

Por too esto, dende'l Bloque llamentáse que Consuelo Vega «se posicione nel ámbitu d'aquellos políticos que pretenden distorsionar la nuestra llingua y pidimos que reflexone sobre les sos declaraciones y les sos responsabilidaes nel cargu», remarcó Fernández.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam