Votos: 9

• 1
• 2
• 3
• 4
• 5

El Bloque denuncia discriminación nel 012 por usar l’asturianu

El Bloque por Asturies espresó la so molición al coordinador del 112 d’Asturies, César Álvarez Avello, «pol tratu que recibió una muyer, yá mayor, al facer usu del serviciu d’atención a la ciudadanía nel so idioma maternu, l’asturianu». La organización afirma qu’esta muyer, al usar la llingua asturiana «la única respuesta que recibió de la trabayadora que taba na centralita foi que “nun la entendía”, una respuesta que se repitió delles veces mentes la usuaria intentaba comunicase por tolos medios n’asturianu».

A xuiciu del Bloque por Asturies, esti fechu, «grave de por sí», vulnera l’Estatutu d’Autonomía, la Llei d’Usu y el pactu de Gobiernu. «Estó tovía ye más grave si asocede nun serviciu como’l 112, onde les persones han tar capacitaes pa entender cualquier tipu d’incidencia, y más nesti casu porque, según la denunciante, nin siquiera-y dieron la posibilidá de comunicase con otra trabayadora que tuviera capacitada p’atendela». Nesti sen, la organización sostién que «la seguranza de les persones nun pue depender del caprichu de nengún trabayador a la hora d’intentar entender a un usuariu nun idioma que nun supón mayor problema de compresión». Por esti motivu, el partíu políticu pide al coordinador que «tome les midíes pa qu’esto nun vuelva a asoceder y nun tengamos que llamentar cualquier desgracia por un abandonu inxustificáu. Los servicios públicos páguense colos impuestos de tolos contribuyentes y nun tien razón de ser que teniendo les mesmes obligaciones nun tengan los mesmos derechos».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam