Cultura

La Banda de Gaites Llacín trunfa na primer xornada de les celebraciones del Día d’Asturies

06/09/2010 a les 14:15:12

La Banda de Gaites Llacín de Llanes llogró un éxitu importante na primer xornada de les celebraciones por cuenta del Día d’Asturies. L’espectáculu tituláu Xideces foi la base del conciertu qu’ufiertaron el sábadu pasáu en Ribeseya. A los más de sesenta miembros de la Banda, ente gaiteros y percusionistes, xúntense los componentes de Felpeyu, Xose Ambás, una sección de vientos (Kiko Flores –saxo–, Agustín Lara –trompeta–, Miguel Herrero –trompeta– y Toño Gómez –trombón–), el batería Tana y los baillarinos de l’agrupación D’Escarpinos. Amás, nesta ocasión, tamién convidaron a xubir al escenariu a dellos miembros del grupu local Corquiéu (Rigu –gaita–, Puru –bodran– y Dani –flauta–), les pandereteres Danzaina, el gaiteru José Manuel Tejedor, la cantante Marta Elola y cinco músicos llegaos dende Bretaña: cuatro bombardistes (Simon, Alex, Meden y Amel) y un flautista (Arnaud, qu’anguaño pertenez a la banda qu’acompaña a Alan Stivell).

Ente toos ellos iguaron una actuación enllena de maxa y emoción delantre d’un públicu multitudinariu que siguió sollerte tolo que pasaba nel escenariu. La espectacularidá d’esta propuesta, nueva dientro de les bandes de gaites, dexó ablucaes y verdaderamente encantaes a les miles de persones, asturianes y visitantes, que s’averaron hasta la villa. Xideces (palabra que na xíriga de los teyeros de Llanes significa 'coses guapes, prestoses') foi un dignísimu esponente del altor y calidá que la música asturiana tien anguaño. Música tradicional asturiana, pero tamién gallega («Aires de Pontevedra») o composiciones d’autores célticos como’l guitarrista bretón Dan Ar Bras («Graceland») sonaron con fuerza y maestría nesti conciertu perespecial col que principiaben los actos del Día d’Asturies.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam