Actualidá

El PP balear, dividíu pol catalán como requisitu pa los funcionarios

REDACCIÓN. UVIÉU - 10/01/2012 A LES 12:27:35

La propuesta del Gobiernu balear, encabezáu pol popular José Ramón Bauzá, de modificar la Llei de Función Pública y eliminar el catalán como requisitu, ta dividiendo al mesmu partíu. El Conceyu de Pollença, gobernáu por PP y Lliga Regionalista, anunció que va siguir los pasos del de Manacor, tamién en manes populares, qu’alcordó colos otros partíos alegaciones contra la modificación.

En Manacor, el mesmu alcalde y vice-presidente del PP balear, Antoni Pastor, votó favorablemente a les alegaciones, anque otros dos rexidores desmarcáronse y punxéronse del llau de Bauzá. Pastor afirmó que cola modificación taben cambiándose les regles consensuaes en 1986, «porque venticinco años depués tamos creando un problema onde nun lu había».

El presidente de les Isles yá indicó que diben analizar la situación y tomar les decisiones oportunes, anque recordó que la modificación de la llei yera un compromisu electoral. De llegar a aprobase l'anteproyectu de llei, esti entraría en contradicción cola Llei de Normalización Llingüística de Baleares y la del Réxime Xurídicu de l'Alministración.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam