Les Noticies.com. Diariu dixital. 09-09-2010
Aznar diz que Zapatero «nin tien, nin tenía» condiciones pa ser presidente del Gobiernu
Fecha: 18/02/2010 a les 18:50:00José María Aznar, ex-presidente del Gobiernu español, punxo en dulda la capacidá del presidente actual, José Luis Rodríguez Zapatero, pa dirixir l'Estáu español.
Nuna conferencia organizada pola Fundación FAES –que preside'l propiu Aznar– en collaboración con Nueves Xeneraciones del PP, na facultá d'Económiques d'Uviéu, l'ex-presidente cargó contra'l Gobiernu del PSOE al asegurar que'l «xefe de los pirómanos nun pue ser el capitán de los bomberos. España necesita de l'ayuda d'un bon equipu de bomberos qu'apague esti fueu».
La conferencia foi, a poco y a poco, faciéndose más tensa. Un grupu de mozos y estudiantes interrumpieron a Aznar en delles ocasiones llamándolu «asesín», «terrorista» o «fascista». El públicu qu'enllenaba l'aula de la facultá d'Económiques respondió-yos llamándolos «rojos» o faciendo alusiones a Franco y la unidá del Estáu español.
Los estudiantes foron espulsaos de males maneres de la conferencia poles fuerces de seguranza y por delles persones anónimes del públicu. Al tiempu, dende l'esterior del aula les consignes contra l'ex-presidente del Gobiernu nun aparaben de repetise: «Aznar, fascista, yes un terrorista», o « Nun pasarán, nun pasarán», frases que l'ex-presidente contrarrestó con un «anque pasen los años, dalgunos nun pueden vivir ensin mi», al tiempu que'l públicu se ponía en pie gritando «presidente, presidente»
Ente xiblíos y aplausos, el presidente de FAES prosiguió'l discurso de descalificación al Gobiernu socialista, al tiempu qu'emponderaba los éxitos acollechaos, tanto en materia económica como d'imaxe esterior, nos ocho años de mandatu del PP. «¿Cómo ye posible que, dende l'añu 2004, se punxera en peligru la Transición, que foi la clave del nuestru éxitu?, comentó l'ex-presidente.
Enantes d'acabar el discursu, aseguró que la situación actual d'España «ye más preocupante que nel 1996 –añu de la so llegada a la Moncloa–, la nuestra economía ye más débil y, amás, tamos peor colocaos nel mundu».
La salida d'Aznar de la conferencia tamién foi abondo polémica. En cuantes l'ex-presidente del Gobiernu cruzó'l hall de la facultá d'Económiques, dellos grupos de mozos y estudiantes glayaron contra él. Aznar respondió llevantando'l deu corazón en señal d'insultu hacia los manifestantes.
Depués de la conferencia, l'alcalde d'Uviéu –presente nel actu xunto con otros cargos y dirixentes del PP asturianu– manifestó a los medios de comunicación la so indignación colos fechos socedíos minutos enantes. De Lorenzo aseguró qu'énte estos fechos «dalguna cosa tien que pasar» y, al empar, esixó a la Delegación del Gobiernu n'Asturies «garrar a les persones qu'insultaron y entregales a la Xusticia». «Si empezamos asina, mal vamos a siguir. Ta claro que la próxima vez, vamos tener que defendenos nun actu d'esti tipu», insitió l'alcalde d'Uviéu.
Comentarios fechos (1)
economín Fecha: 19/02/2010 a les 12:08:51
Mui bona crónica. Yo tamién tuvi ehí y, si bien ye verdá que nun me dio por llevantame y insultalu, lo cierto ye que nun tenía qu'habese celebráu un actu asina na Universidá. Faeslo n'otru espaciu y aforres problemes (toi pensando nel Auditoriu, que pa eso tien sales bien guapes). Amás, foi vergonzoso ver gritar a la xente de nueves xeneraciones coses como "rojos" (como si esto fora un insultu) o "viva Franco" mentes echaben a los manifestantes de la sala como si fueren terroristes. Incluso dalgunos gritaben "¡tírala, tírala!" pa qu'unos de seguridá emburriaren a una moza de les que gritaben dende'l pasillu. Llamentable.
07/09/2010 - UNA y Bloque aseguren que nel 8-S «ábrese una puerta a la esperanza»
20/08/2010 - Descubren nos Picos d'Europa la mayor travesía subterránea del Estáu Español
09/09/2010 - Bloque y UNA piden en Xixón una alternativa «pol futuru d'Asturies»
02/09/2010 - Bloque y UNA súmense a la convocatoria de la Plataforma 8 de Setiembre
09/09/2010 - Izquierda Xunida reafírmase nel asturianismu en Santalla
RSS Lesnoticies.com
Apúntate en Facebook
Semeyes en Flickr
