Sociedá

Asturies ye’l sitiu del mundu con más bayura de bolos

04/03/2010 a les 11:01:49

L'Atles de los bolos asturianos apurre un análisis a fondu del xuegu de los bolos, nel que destaca Asturies en cuantes que ye'l sitiu del mundu «más densu y ricu en bolos». Esta ye una de les conclusiones d'esta investigación fecha por Carlos Suari, llicenciáu en Ciencies de l'Actividá Física y del Deporte con estudios n'Antropoloxía Social y Cultural. Ye, amás, etnógrafu especializáu nel patrimoniu lúdico-motor y la so aplicación a la enseñanza, redactor y presentador na RTPA y collaborador de LES NOTICIES.

«De toles cultures investigaes hasta la fecha, ye l'asturiana la que da un númberu más eleváu de xuegos de bolos, siendo amás un casu d'escepcional variedá, intensidá y trescendencia social», indícase na investigación. Los datos foron recoyíos nel noroeste ibéricu, onde predomina'l rasgu «a aventar» na macrorrexón que va, pela llinia de costa, dende l'Atlánticu gallego-portugués hasta Carreño. Mentanto, el rasgu «facer trayectories cola bola» tópase na macrorrexón que, pela mariña, va dende Xixón hasta dellos quilómetros al Este de Santander.

Otra de les cuestiones sobre la que se llama l'atención nel estudiu ye sobre cómo los xuegos tradiciones de bolos van siendo escaecíos: «Tolos que se conserven anguaño presenten graves problemes de viabilidá, fundamentalmente pol avieyamientu de los practicantes y pola perda poblacional de los llugares onde se xuega», comenta Suari.

L’Atles de los Bolos Asturianos presentóse esti branu como un estudiu que quería afondar nos raigaños culturales de los xuegos de bolos n’Asturies, aprovechando pa facer un rastrexu del repertoriu, reformulando variables y clasificaciones de dalgunes investigaciones previes. L’encargáu d'esti llabor foi Carlos Suari, que contó cola collaboración de munches persones, alministraciones y entidaes socioculturales qu’aportaron información o informantes d’altisimu valor pa esti trabayu, llegando inclusive a la rede social Facebook.

El trabayu, que tuvo una ayuda del Principáu d’Asturies por un valor d’alredor de los dos mil euros, tuvo una duración de más de diez meses y analizó cerca de 800 paquetes de datos ente la bibliografía y les visites, les entrevistes y les encuestes directes y diferíes feches nos setenta y ocho conceyos asturianos, l’oriente gallegu, el Norte de Llión y bona parte de Cantabria. Amás, buscáronse referencies del restu del marcu européu que permitienon facer dalgunes interpretaciones de conxuntu.

Agora y con too ello, prepárase un material divulgativu pal que ta buscándose forma y fontes de financiación en collaboración con Suburbia Ediciones. El llibru va constar de tres partes: un ensayu, una guía de tolos xuegos de bolos asturianos y un miniatles coles considerances etnoxeográfiques más interesantes.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam