Sociedá

Asturies ta presente nel Día Mundial de los Pueblos Indíxenes

09/08/2010 a les 18:49:19

Esta tarde, el Paséu de Begoña en Xixón va convertise nuna fiesta revindicativa con baille, música y muncha reflexón sobre lo que ta pasando nel mundu non-desarrolláu, según los parámetros occidentales. Convocada por asociaciones diverses como Picu Rabicu, Pachacuti, el colectivu Luciano Romero o la Coordinadora de ONGD, celebra'l Día de los Pueblos Indíxenes nesti 9 d'agostu por ser la fecha impuesta por la ONU pa promocionar los sos derechos.

El 9% de la población mundial ye población indíxena, y representa unu de los colectivos más probes. Mentes caminen hacia la so extinción pola mor de les males acciones de los países más desarrollaos, aprobábase en 2007 la Declaración de Naciones Uníes palos Pueblos Indíxenes –que recalca'l derechu a tener les sos instituciones, cultures y tradiciones propies– o'l Congresu español ratificaba'l convenio 169 de la OIT sobre pueblos indíxenes y tribales en países independientes –que reconoz los drechos sobre la tierra, l'empléu, la salú, la educación o la non discriminación–.

El portavoz del Grupu Parllamentariu del Bloque, Roberto Colunga, desplicaba esta mañana en rueda de prensa que la firma d'estos convenios «tendría d'obligar a toles alministraciones y instituciones. Tamién a la Xunta Xeneral» y denunciaba qu'«el Parllamentu asturianu lleva dos años ensin debatir una Proposición Non de Llei relativa a los Derechos de los Pueblos Indíxenes». Esta proposición presentóse en mayu de 2008 y ta almitida a trámite dende entós.

Enantes de la comparecencia, representantes del Bloque por Asturies aconceyaben con Vicente Otero Chate, dirixente indíxena del pueblu Nasa y responsable de Comunicaciones del CRIC (Consejo Regional Indígena del Cauca) de Colombia, que-yos mostró no que diba a consistir l'Encuentro Internacional de Comunicación Indígena, que va a celebrase del 29 d'agostu al 5 de setiembre en Chimaltenango (Guatemala) y del que yá s'anunciara'l Primer Taller de capacitación Audiovisual para Mujeres Indígenas que va a promover la participación de les muyeres na estaya de la comunicación.

Nesi sen, la Conseyería de Bienestar Social presentó, a traviés de l'Axencia Asturiana de Cooperación al Desarrollo, la nueva Estratexa Asturiana de Cooperación colos pueblos indíxenes. Los puntos fuertes d'esti documentu ponen el puxu nos sistemes de salú, la meyora de la educación, la cultura y el desarrollu, la promoción de la muyer y l'algame de los drechos de los pueblos indíxenes. Marcos Cienfuegos, director de la Axencia Asturiana de Cooperación al Desarrollu, recalcó les dificultaes de la población indíxena que representa cuasi 500 millones de persones que formen unos 5.000 pueblos y que tan viviendo en más de 70 estaos diferentes, polo que «trabayar colos pueblos indíxenes ye una exa prioritaria». El trabayu que vien desendolcando l'Axencia nos últimos nueve meses pa cuntar cola Estratexa «sitúa al Principáu d'Asturies na vanguardia de la cooperación colos pueblos indíxenes», recalcó'l vocal de la Comisión Asturiana de Pueblos Indíxenes, Adrián Redondo.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam