Editorial

Asturies necesita un Gobiernu estable

LES NOTICIES. UVIéU - 08/07/2011 A LES 14:02:03

Pasaos 50 díes dende les elecciones y viendo’l resultáu tan ruin que producieron les negociaciones pa dotar al país d’un Gobiernu estable, la ciudadanía empieza a considerar una enquivocación de los nuestros parllamentarios demorar tanto’l procesu d’investidura del presidente. Y ye que tal parez que los partíos con representación na Xunta Xeneral quieren más facer el paripé que garrar les responsabilidaes de Gobiernu. Del análisis de les sos estratexes, rescampla la voluntá de defender más los intereses de partíu que l’interés xeneral de los asturianos. Nel contestu actual de crisis económica, un Gobiernu que ye’l principal inversor d’un territoriu, como ye’l casu d’Asturies, nun pue tar dos meses paráu, porque los daños pa l’actividá económica son mui altos. Si esi parón diera como resultáu un Gobiernu estable y pa tola llexislatura, la espera y les perdes que supón podíen dase por bien invertíes, pero nengún partíu, en realidá, quier sofitar el Gobiernu futuru, quitando Foru Asturies, qu’ofreció dende’l principiu, y acordies colos resultaos electorales y les circunstancies económiques, un Gobiernu apoyáu por tolos grupos políticos.

Refugada la propuesta d’un Gobiernu de concentración, namás hai tres mayoríes absolutes posibles nel panorama parllamentariu actual. Dende un puntu de vista numbéricu –y non ideolóxicu–, una d’elles ye la que formaríen FAC y PSOE, que’l PSOE refugó col argumentu poco consistente de que la ciudadanía decidió ponelos na oposición (ye inocente pensar que, nesi mesmu contestu pero con un sociu d’esquierda que-y apurriera la mayoría, la FSA diba caltener el mesmu criteriu). Otra ye la que podíen formar Foru y PP, la que se tuvo negociando y na que’l PP s’enquivocó al dar un xiru total a la negociación depués de bien avanzada y presentar un órdagu pa salvar a Gabino de Lorenzo, colo que va costar muncho a los populares convencer a la ciudadanía de que tuvieron una actitú negociadora seria. La última mayoría posible ye la que formen PSOE y PP, qu’ensayaron a la hora d’escoyer la mesa del Parllamentu, al apoyar el PSOE al candidatu del PP y dexar fuera a IX, mayormente p’atacar al so enemigu común nuevu: Foru Asturies. Pero nun parez que vaigan llevar la fórmula a les últimes consecuencies y formar Gobiernu.

Al averase al final del procesu d’investidura del presidente, que pue dar como resultáu la elección d’Álvarez-Cascos en minoría, cada vez ye más clara la sensación de que, emperraos en desgastar a Foru, los partíos estatales –PSOE y PP– salieron peor paraos énte una opinión pública que nun entiende la falta d’altor institucional. Na sociedá queda la sensación de que los partíos estatales nun asumieron los resultaos electorales de mayu nin quieren asumir la responsabilidá de gobernar, de construír el futuru, sinón que quieren más veles venir na oposición mentes desgasten al Gobiernu. Al final, acabamos perdiendo los asturianos pa que ganen les sos estratexes de partíu. Y eso ye mui peligroso, porque desacreíta a la clas política en xeneral, entorga’l desenvolvimientu del país los próximos años y lleva al desapegu del pueblu pa coles instituciones que paga colos sos impuestos.