Economía

ASGECO pide a los consumidores qu’esixan el cumplimientu de les ofertes del Mundial

13/07/2010 a les 11:09:12

L’Asociación Xeneral de Consumidores, ASGECO Confederación, animó a traviés d’un comunicáu a los consumidores que s’aprovecharon de les ufiertes que fixeran munches empreses –que lligaben descuentos o devoluciones íntegres del importe de los sos productos a una hipotética victoria de la Selección Española nel Mundial de Sudáfrica– a solicitar ensembre la cuantía convenida en cada casu.

ASGECO Confederación ye consciente del atractivu de les campañes de márketing realizaes por dalgunes grandes empreses ente los meses d’abril y xunetu, que producieron un aumentu evidente de les ventes pa les compañíes, y esixó a los establecimientos vinculaos a les ofertes que cumplan lo prometío cola mayor dilixencia y responsabilidá.

Dalgunos d’estos establecimientos, señala l’asociación de consumidores, comprometiérase a devolver l’importe íntegru de productos informáticos, electrodomésticos, viaxes y hasta sintonizadores de TDT alquiríos ente los meses d’abril y xunu. Inclusive dalgunes entidaes bancaries, como Banesto o Sabadell, prometieron interese más altos en dalgunos de los sos productos d'inversión en casu d’una victoria española nel Mundial.

L’Asociación Xeneral de Consumidores, ASGECO Confederación, recomienda a los consumidores averase a estos establecimientos con tolos documentos acreditativos necesarios, recordándo-yos que nun tienen por qué renunciar a los derechos que-yos correspuenden y aconséya-yos que denuncien les posibles irregularidaes, acudiendo a esta asociación pa recibir asesoramientu en casu de vese perxudicaos.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam