Cultura

Arias-Cachero: «Cesar al Ferreiro foi una indignidá»

11/02/2010 a les 15:51:39

LES NOTICIES, na so edición impresa, publica una entrevista con José Suárez Arias-Cachero, Felechosa, conceyal de Cultura nel Conceyu d’Uviéu. Ufiertamos equí delles preguntes que-y fiximos pa la edición dixital.

El Gobiernu del Principáu d’Asturies apuesta pol Camín de Santiago, invierte una bona cantidá de dineru, asitia a Uviéu como embrión del Camín... ¿Nun contradiz esto la teoría del Cercu d’Uviéu?
Sorpriéndeme muncho que me diga esto cuando como se sabe l’únicu presidente que nun acudió a la presentación del Añu Xacobéu foi Vicente Álvarez Areces, dexando muda a Asturies. ¿Por qué Areces nun tuvo en Xaca? Porque nun-y interesa lo más mínimo’l Camín de Santiago. El PSOE n’Asturies tien un triple problema col Camín de Santiago, que demuestra les carencies del PSOE nel Gobiernu d’Asturies. El camín de Santiago ye una gran realización cultural europea inventada por un rei asturianu y que ta conectada íntimamente cola identidá asturiana; como tolo que tenga que ver cola identidá asturiana, conviértese nun problema pal PSOE n’Asturies. Ye dalgo que-yos asusta. Hai que preguntase por qué’l PSOE nun ye quien a convertir el patromoniu de los asturianos en dalgo que produza bienestar de los asturianos.

Home, invierten 3,5 millones d’euros...
Eso nun son perres nel añu en que Galicia espera diez millones de visitantes. Anque namás una fracción pequeña d’esa xente pasara pel Camín Primitivu, l’alza turística n’Asturies diba ser tremenda. Turística, d’impactu mediáticu nel mundu, xeneración de marca, etc.

Falaba usté d’un triple problema.
Sí, ún ye que ye identitariu y eso conviértelo en problemático pa un partíu que tien una rellación tan complicada con tolo que ye la identidá asturiana. Otru problema pa ellos ye que ye relixosu. La cultura occidental tien una base cristiana. Los creyentes y los non creyentes participen d’una tradición cristiana, inclusive los que como yo creemos na bondá de la laicidá del Estáu. ¿Significa esto que tengamos qu’arrenunciar al fundamentu cristianu de la cultura occidental, arrenunciar al fundamentu de la llibertá? Nun hai más que comparar esta sociedá en términos de llibertá cola que se xeneró al amparu d’otres relixones. Pero esto nun lo entiende asina’l Gobiernu socialista d’Asturies y como’l Camín ye un símbolu relixosu ye tamién un problema. Y el tercer problema: el Camín nació n’Uviéu. Cualquier protagonismu que se-y dea al Camín de Santiago ye pa dá-ylu a Uviéu, y a El Salvador y a la Catedral d’Uviéu. Ehí yá ta’l tercer problema que tien Areces. ¿Cómo va facer él dalgo que favoreza a Uviéu?

¿Qué piensa de la destitución de Pepe El Ferreiro?
El cese del Ferreiro, quiero dicilo enantes que nada, ye una indignidá. Una indignidá que tien un puntu d’espropiación. Col cese, quixeron espropia-y a Pepe El Ferreiro la obra de la so vida y quixeron espropia-y la dignidá. Ye otra muestra de que Vicente Álvarez Areces tien unes zunes derivaes del so pasáu estalinista que nun pue evitar. Ye un ataque al individuu, un ataque al paisanu que más fixo, con Juaco López, pola etnografía asturiana. A esti paisanu espropiáron-y la obra, sustitúinlu por daquién que va cobrar más ensin saber muncho bien ónde va. El Gobiernu d’Asturies fai esto nuna demostración del poder de l’Alministración frente al individuu. Yo, la verdá, nun doi creitu nin como lliberal nin como asturianista. El PSOE n’Asturies quier demostrar que Leviatán ta penriba del individuu y que pueden cesar de forma mísere a un paisanu. Macháquenlu, amás, porque fixo dalgo pola cultura asturiana. La respuesta popular, y la reacción novedosa al través de canales como Facebook, ye un motivu d’esperanza. La reacción popular a esti abusu de poder da esperances.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam