Asturies

Areces insiste en que l'AVE del Cantábricu «nun ta na primer llinia» de les necesidaes d'Asturies

16/02/2010 a les 13:45:00

El buró políticu de la Conferencia de Rexones Perifériques Marítimes que se celebra na Llaboral ye un espaciu abiertu a la reflexón sobre'l futuru de les rexones europees y nel que tienen un protagonismu especial los fondos comunitarios y les infraestructures. Nesti puntu, el presidente del Gobiernu, Vicente Álvarez Areces, señaló que la iniciativa de construír l'AVE del Cantábricu «ye un tema yá recurrente» y recordó que'l so partíu yá dixera al respective d'esta infraestructura que «sí, pero non a toa costa».

Estes declaraciones prodúcense xusto depués de que'l ministru de Fomentu, José Blanco, descartara estos díes el pasu d'esta llinia d'alta velocidá pela rasa cantábrica nel espaciu asturianu. Álvarez Areces reforzó, con matices, l'anunciu de Blanco al señalar que «nun momentu de restricción del gastu públicu, d'existencia d'otres prioridaes, nun ta na primer llinia de les nuestres necesidaes».

Al empar, el presidente asturianu remarcó que «siempre dixeren que sí» a la infraestructura «pero qu'había que tener munchu procuru nel estudiu ambiental porque tenemos una rasa costera mui estrecha que yá ta atravesada por víes de comunicación, como l'Autovía del Cantábricu, qu'afecta a munches esplotaciones ganaderes de tou esti territoriu asturianu de la rasa costera y qu'había que velo con munchu cuidáu».

Con too y con eso, Álvarez Areces reconoció que, anque l'AVE del Cantábricu ta incluíu nel PEIT (Plan Estratéxicu d'Infraestructures y Tresportes), «nós nun lu punximos nunca nes nuestres prioridaes». La prioridá pal líder del Executivu ye acabar l'AVE radial con Madrid: «Nesto'l Ministeriu apoya dafechu y tenemos plena seguranza de que los plazos van cumplise». Amás, Álvarez Areces ta enfotáu en que tamién se cumplan los plazos nes grandes autovíes de la costa y l'interior. «Por eso Asturies, anque vivimos una etapa de restricción, cuenta cola fortuna de tener en plazos contractuales les grandes obres que tán en marcha y polo tanto la seguranza de que se van acabar».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam