Actualidá

El PP aprueba'l despidu más baratu y la posibilidá de que los paraos que cobren desempléu faigan prestación de servicios

REDACCIÓN . UVIÉU - 10/02/2012 A LES 19:25:00

La Reforma llaboral del Partíu Popular supón abaratar y facilitar el despidu, ampliando la posibilidá de despidir por causes oxetives con una indemnización de 20 díes de salariu por añu a los empleaos d'Entes Públicos. Amás, esta reforma va impulsar que los desempleaos que tean cobrando prestación de desempléu tengan que facer servicios a la comunidá.

Eliminación de l'autorización alministrativa nos Espedientes de Regulación d'Empléu
Cola reforma publicada nel BOE, simplifíquense los trámites pa reducir la xornada de trabayu o suspender el contratu como mecanismu d'axuste énte situaciones de mengua de la demanda. Elimínase l'autorización alministrativa necesaria pa facer esta midida qu'había hasta agora.
 P'ayudar a les empresas en situaciones económiques adverses, introduzse una bonificación del 50% de les cuotes empresariales a la Seguridá Social de los trabayadores afectaos pola suspensión o reducción de xornada, con una duración de 240 díes máximu y condicionada a la durabilidá nel empléu polo menos un añu.


Negociación colectiva
La reforma establez que van tener prioridá los convenios de empresa, de forma que, independientemente de lo que se pacte a nivel superior, los representantes de los trabayadores y l'empresariu puen consensuar un conveniu d'empresa que s'afaiga al casu d'ellos. Per otru llau, la renovación automática de los convenios namás que tendrá vixencia dos años.

Despidu
La reforma llabora aprobada pol Gobiernu del Partíu Popular facilita y abarata'l despidu n'España. No que se refier a la estinción llaboral por causes empresariales, 
clarifíquense les causes del despidu, 
elimínase l'autorización alministrativa previa,
 permítese que los Entes del sector públicu invoquen como les empreses privaes causas económiques, técniques, organizatives y de producción pa poder despidir personal con una indemnización de venti díes.
 A partir del 11 de febreru, xeneralízase la indemnización por estinción del contratu indefiníu de 33 díes por añu trabayáu en casu de despidu improcedente, con un máximu de 24 mensualidaes. Sicasí, respétense los derechos adquiríos de los trabayadores, esto ye, la reforma nun ye retroactiva y pa los contratos antiguos, la cuantía nueva d'indemnización namás será d'aplicación pa la futura vida llaboral dende la entrada en vigor d'esta norma. Los contratos en vigor hasta la reforma conserven el derechu a obtener una indemnización d'hasta 42 mensualidaes. La indemnización pola estinción del contratu indefiníu va ser de 20 díes por añu trabayáu en casu de despidu procedente por causes oxetives, con un máximu de 12 mensualidaes

Llucha contra'l fraude y prestación de servicios de los desempleaos que cobren prestación
La reforma nueva propón un Plan especial de la Inspección de Trabayu y Seguridá Social que garantice'l cumplimientu estrictu de la Llei. Amás, y esto ye una grandísma novedá, va impulsase que los desempleaos que tean cobrando la prestación faigan servicios d'interés xeneral en beneficiu de la comunidá al traviés de convenios de collaboración coles Alministraciones públiques.

Capitalización de la prestación por desempléu

La reforma da la facilidá de cobrar el 100% de la prestación por desempléu pa los menores de 30 años y les muyeres hasta 35 años si entamen una actividá como trabayadores autónomos.

Derechu a la formación
P'ameyorar la empleabilidá de los trabayadores introduzse'l derechu a la formación, cola idea de tentar d'evitar qu'un cambiu tecnolóxicu o d'otru tipu suponga'l despidu del trabayador. Esti derechu van poder disfrutalu los trabayadores con más d'un añu d'antigüedá y van supone-yos un permisu retribuíu de 20 hores anuales d'actividaes formatives con conteniu vinculáu al puestu trabayu.

Contratu pa la formación y l'aprendimientu

Pa intentar menguar el grandísimu paru de la mocedá, el Gobiernu quier impulsar el contratu pa la formación y l'aprendimientu, al que van poder acoyese los menores de 30 años, y que va poder facese en dellos periodos de formación consecutiva en distintes empreses o sectores d'actividá.


Contratu indefiníu d'apoyu a los emprendedores
La reforma presentada pol Gobiernu del Estáu, qu'entra en vigor el 11 de febreru, impulsa un contratu nuevu de carácter indefiníu pa pymes y autónomos (empreses de menos de 50 trabayadores), que suponen el 95% del texíu productivo, coles siguientes característiques: esti contratu va tener un periodu de prueba d'un añu, la empresa tendrá derechu a una deducción fiscal de 3.000 euros cuando contrate'l so primer trabayador menor de 30 años, los emprendedores que contraten un trabayador que tea en paru van poder deducir fiscalmente'l 50% de la prestación por desempléu que viniera cobrando'l trabayador nun plazu d'un añu. El trabayador podrá voluntariamente percibir, amás del sueldu, el 25% de la so prestación por desempleu nel mesmu periodu.
Amás la reforma establez un réxime de bonificaciones dirixíes a colectivos de desempleaos y desempleaes con mayores dificultaes pa la so incorporación al mercáu llaboral, n'especial pa la mocedá, pa paraos de llarga duración mayores de 45 años y pa muyeres en sectores onde esti colectivu tuviera poco representáu.


Llimitación del encadenamientu de contratos temporales
A partir del 31 d'avientu de 2012 recupérase la prohibición d'encadenar contratos temporales más p'allá de los 24 meses.

Regulación del teletrabayu
Regúlase pela primer vez el teletrabayu, pa garantizar el derechu a una retribución equivalente a los trabayadores qu'acuden presencialmente al centru de trabayu.

Clasificación profesional y movilidá funcional 

Elimínase'l sistema de clasificación de trabayadores por categoríes profesionales y xeneralízase'l sistema de grupos profesionales.


  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam