Economía

Aprobóse'l Decretu que prorroga'l presupuestu del 2011

REDACCIÓN. UVIÉU - 29/12/2011 A LES 13:37:13

El Conseyu de Gobiernu aprobó esti 18 d'avientu'l Decretu pol que se regula l'aplicación de la prórroga de los Presupuestos Xenerales del 2011 pal añu que vien. La prórroga de los Presupuestos tien un carácter automáticu dende'l 1 de xineru. Según l'Executivu, la prórroga va afayase a les esixencies en materia de déficit y control presupuestariu «y tien en cuenta esperiencies pasaes que foron valoraes positivamente polos órganos de control xurisdiccional».

El Presupuestu prorrogáu va amenorgase en 423 millones d'euros en comparanza col del 2011. Según indiquen, les estimaciones d'ingresos del añu 2011 alcuéntrense sobrevaloraes en 197,7 millones d'euros, polo que nun tienen en cuenta esta partida. Por eso, el decretu prevé la cifra máxima d'ingresos sobre la que se tienen que consignar los gastos prorrogaos, que se ve menguada en 620,7 millones d'euros. Otra manera, los gastos tán adaptaos a les estructures orgániques nueves de les Conseyeríes y depuráronse los gastos específicos del 2011, rellacionaos con actuaciones concretes desenvueltes a lo llargo del añu qu'acaba.

Per otru llau, van mantese los creitos vinculaos a la percepción d'ingresos y les subvenciones y tresferencies necesaries pal funcionamientu de los entes y organismos que formen parte de l'Alminsitración, «siempre y cuando nel exerciciu se mantengan los supuestos de fechu y derechu que determinen l'asignación de la subvención nel 2011».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam