Cultura

Antonio Ripoll, director del Palacio Valdés, Premiu Oh! d'Honor

REDACCIÓN. UVIÉU - 02/02/2012 A LES 14:33:55

L'Asociación de Compañíes Profesionales de Teatru y Danza d'Asturies (ACPTA) va concede-y el Premiu Oh! d'Honor 2012 a Antonio Ripoll, director, dende 1992, del Teatru Palaciu Valdés, en reconocimientu a la so trayectoria profesional. Ente los sos méritos, la organización de los Premios Oh! destaca'l llabor que Ripoll fixo a lo llargo d'esti tiempu na ampliación continuada de la programación d'Artes Escéniques n'Avilés.

Antonio Ripoll ye llicenciáu en Filoloxía Románica pola Universidá d'Uviéu y máster de Xestión Cultural, Teatru, Música y Danza pola Universidá Complutense de Madrid. Dende 1979 dirixe la Casa de Cultura d'Avilés y ye miembru de la Rede Española de Teatros, Auditorios y Circuitos de Titularidá Pública dende la so constitución.

ACPTA va entregar el Premiu Oh! d'Honor a Antonio Ripoll na gala de la tercer edición d'estos gallardones, que se va celebrar el sábadu 4 de febreru, nel Teatru Xovellanos de Xixón, a les 20.30 hores. Los Premios Oh! creáronse col oxetivu de reconocer, anualmente, el talentu de los profesionales de la escena asturiana. La gala d'entrega de los Oh! van presentala l'actriz Olga Cuervo y el periodista Pachi Poncela. El grupu The Covers va ser l'encargáu de poner ritmu a esta fiesta del teatru asturianu. Les entraes p'asistir a la gala de los Oh!, que son de baldre, van tar disponibles pal públicu a partir del día 3 de febreru na taquilla del Xovellanos.

A esta tercer edición concurrieron un total de 152 candidatures, un 31% más que na edición del añu pasáu. El xuráu ta formáu por Diego Díaz, críticu de La Nueva España; Jaime Luis Martín, programador del Centru Cultural Valey de Castrillón; Ana López, directora del área de Cultura del Auditoriu Kultur Leioa; Antonio Criado, programador del Teatru Xovellanos, y Rosa Díez, fundadora de la compañía La Rous y Premiu Nacional de Teatru Intantil.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam