Sociedá

Ámbitu pon nos quioscos l'últimu númberu de la edición impresa de LES NOTICIES

REDACCIÓN. UVIÉU - 03/02/2012 A LES 13:15:12

Dende'l vienres 3 de febreru pue atopase nos quioscos de toa Asturies el númberu 769 de LES NOTICIES, últimu de la edición en papel d'esti selmanariu. L'adelantu electoral ye'l tema del reportaxe d'apertura d'esti númberu, al que sigue una entrevista sobre la situación social, económica y política d'Asturies col profesor d'Economía Pública Roberto Fernández Llera.

Sicasí, la mayoría de los conteníos d'esti númberu especial tán dedicaos a repasar la historia recién del movimientu asturianu de reivindicación llingüística y del asturianismu en xeneral, ámbitos onde LES NOTICIES xugó un papel destacáu nos últimos 15 años. Con esti oxetivu, entrevistóse a Amelia Valcárcel, ex-conseyera de Cultura d'Asturies y una de les figures fundamentales na recuperación de les señes d'identidá asturianes al traviés de la so participación en Conceyu Bable. El profesor de la Universidá d'Uviéu, Juan Carlos Villaverde, aporta tamién la so reflexón crítica sobre'l procesu de recuperación llingüística.

Otres voces presentes nesti últimu númberu impresu son les de Ramón d'Andrés –que firma un artículu sobre la llingua periodística y el llabor qu'esti selmanariu desenvolvió na normalización del asturianu escrito– o Cristóbal Ruitiña –qu'analiza la importancia que tien pa una comunidá contar con medios de comunicación a la hora de construír una mirada propia sobre sí mesma–.

Na sección d'opinión atópense artículos de toles firmes que, hasta esti númberu, veníen analizando l'actualidá asturiana y mundial selmana a selmana, con nomes como los de Rafael Palacios, Laura González, Sidoro Villa Costales, Esther Prieto, Pablo X. Suárez, Paquita Suárez-Coalla, María Cotiello o Berta Piñán, ente más otros.

La lliteratura asturiana, otru de los focos d'atención principales de LES NOTICIES a lo llargo de tou esti tiempu, ta tamién presente nel últimu númberu en papel al traviés de la entrevista al críticu Xosé Bolado, ún de los meyores conocedores de la lliteratura más nueva que se ta escribiendo na llingua del país.

Sicasí, la fin de la edición impresa nun supón l'acabación del llabor periodísticu de LES NOTICIES, que va siguir a diario na so edición dixital. El camín de la difusión de noticies na llingua propia al traviés de la web ye un territoriu compartíu con otros idiomes minorizaos, que tienen na rede una oportunidá d'espresase con munchos menos costos qu'en papel. Asina, como recueye Damián Barreiro nel reportaxe «Un espaciu pa les llingües minoritaries del mundu», Internet permite que los idiomes menos falaos tengan sitiu nel mercáu global de la información, como demuestren los casos de Vilaweb –que, con 500.000 visites diaries, ye'l periódicu dixital en catalán más lleíu–, Goiena –cooperativa de medios locales de la comarca de Mondragón, nel País Vascu– o Sermos Galiza –una iniciativa pa echar un periódicu dixital en gallegu que yá cuenta con un capital social de 300.000 euros–.

LES NOTICIES despídese de los sos llectores en papel depués de publicar venti mil páxines d'información, entrevistes, opinión y reportaxes a lo llargo de más de 15 años, un tiempu nel que nun dexó un vienres ensin acudir a la so cita colos llectores. Esti selmanariu foi un periódicu onde s'exerció'l periodismu profesional y se normalizó l'asturianu, dos xeres que se van siguir cumpliendo en LESNOTICIES.COM.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam