Cultura

Yá ta accesible n'Internet l'últimu númberu de la revista lliteraria «Brixel»

REDACCIÓN. UVIÉU - 03/02/2012 A LES 12:15:27

LES NOTICIES acaba de poner a disposición de los sos llectores l'últimu númberu del suplementu Brixel. Revista mensual de lliteratura, que se publicó xunto a esti selmanariu na so edición del 29 de xineru. El númberu 16 de la revista cultural ábrese con un artículu de Javier Cuevas tituláu «Mitoloxía, lliteratura y identidá», onde s'analiza'l desarrollu de la lliteratura fantástica nes tradiciones culturales del norte d'Europa, que se caltuvieron, a lo llargo de la historia, más averaes a los sos raigaños mitolóxicos. Exemplos d'ello son Stevenson, Walter Scott y Arthur Machen o, más modernamente, Lord Dustany, Poul Anderson o Tolkien.

El tema mitolóxicu ta presente tamién nel testu «Afrodita en Gulpiyuri», de Rosario Hernández Catalán, que fai una actualización de los ritos dionisíacos –orixe de la traxedia griega– na forma d'una propuesta teatral que resucite les divinidaes del Olimpu pa sanar la racionalidá y el deséu –el Logos y l'Eros– de la especie humana. Henrique G. Facuriella dedica'l so artículu a otru de los testos fundacionales de la historia de la lliteratura, la Epopeya de Gilgamesh, un relatu sumeriu-babilónicu sobre Gilgamesh, rei d'Uruk, y la so busca de la inmortalidá. Esti testu toca los dos temes fundamentales de tola lliteratura posterior: l'amor –espeyáu na rellación ente'l protagonista y el so amigu Enkidu– y la muerte –cuando Gilgames, sabedor de la so propia condición mortal depués de que los dioses condenaren a morrer a Enkidu, sal a la busca del que dicen que ye l'únicu home qu'algamó una vida eterna–.

Antón García, na so sección «Vasos comunicantes», traduz al asturianu dos poemes del escritor gallegu Xosé Luis Méndez Ferrín, presidente anguaño de l'Academia da Lingua Galega y una voz fundamental de la lliteratura europea. Pela so parte, José Luis Rendueles reseña'l llibru La gente corriente d'Irlanda, qu'axunta traducíes al castellanu les meyores columnes que publicó na prensa, a lo llargo de venticuatro años, l'escritor irlandés Flann O'Brien.

L'apartáu d'arte protagonízalu'l pintor uviedín Luis Vigil, que fala con Henrique G. Facuriella sobre los motivos principales de la so pintura –ente los que destaquen les figures de la mitoloxía greco-llatina y los santos de la tradición cristiana–, amás de la situación d'encruciada creativa na que s'atopa dende hai tres años.

El númberu de xineru de Brixel ciárrase col artículu «Xugar a crear mundos», onde Sibisse Rodríguez defende una actividá como los xuegos de rol, qu'arrecostina con prexuicios que tienen poco que ver cola realidá, una realidá más rellacionada cola llibertá y la imaxinación que coles trames escures y les persones con dificultaes de socializar a les que davezu s'asocia.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam