Economía

El 40,9 por cientu de los autónomos d’Asturies son muyeres

06/03/2010 a les 10:43:24

La mayor presencia de la muyer nel mercáu llaboral tamién se nota ente los autónomos, hasta’l puntu de qu’a últimos del 2009 yá suponíen ún de cada tres trabayadores por cuenta propia del Estáu, según un informe de la organización d’autónomos ATA que s’ellaboró pol Día de la Muyer. Nel casu d’Asturies, el 40,9 por cientu de los autónomos son muyeres, una cifra que ta per enriba de la media estatal.

En concreto, nel conxuntu del Estáu, al acabar el 2009, les muyeres n’alta nel Réxime Especial de Trabayadores Autónomos (RETA) sumaben 1.057.299 ocupaes, l’equivalente al 33,5 por cientu de los 3.057.046 trabayadores colos que contaba esti Réxime.

La muyer autónoma lidera les iniciatives emprendedores nueves n’España nos últimos cinco años, un periodu onde’l númberu de trabayadores por cuenta propia aumentó en 78.139 ocupaes, un 8 por cientu más, frente al descensu en 78.656 trabayadores de los autónomos homes (-3,6 por cientu).

Amás, les muyeres autónomes demostraron soportar meyor la crisis económica que los homes. Asina, de les más de 150.000 baxes que se rexistraron nel RETA nel 2009, namás el 19,4 por cientu (29.573) foron de muyeres, pol 80,6 por cientu de los homes (122.971).

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam